Tilbake til forsida

Denne artikkelen av Ivar Fylling har også stått på trykk i Adresseavisa:

Oljekrisa - verre enn klimakrisa!

(12/4-08) "Klimakrise" har vi rundt oss i alle media. Oljekrisa er det få som skriv om. Men den forsvinn ikkje av den grunn! I løpet av det siste året har prisen gått frå 60 til over 105 dollar pr. fat. Trass i dette er produksjonen av råolje omtrent som i 2005.

Av Ivar Fylling

Uansett pris: Den globale produksjonen av olje vil avta. Det er geologiske og ikkje klimamessige årsaker til det. Og enno har Kina og India berre så vidt kome igang med motoriseringa! Verken pristak eller "substitutt" for oljen og gassen er å sjå. Den låge dollarkursen og finanskrisa i USA, er økonomiske smertesymptom, som vi så vidt  har sett starten på.

Ein del av tiltaka mot "klimakrisa" vil gjere vondt verre for energiforsyninga, utan å gi nokon "klimagevinst" Eit eksempel som vart presentert i media nyleg, var eit privat og idealistisk motivert kjøp av CO₂-kvote, med sertifikat som garanterte at pengane skulle gå til utbygging av vasskraftverk, kanskje i Equador.

Det vil ikkje gi mindre CO₂ til atmosfæren. I anleggsfasen, og etterpå, kan gi det betre økonomi i Equador, slik at dei får råd til å kjøpe litt fleire bilar, og litt meir olje. Det er bra for mange i Equador, men det gjer ingenting for klimaet, og lite for oljekrisa. Investering har ein tendens til å stimulere forbruk.

Verre er den "grøne" energien frå jordbruket, med omlegging frå matproduksjon til drivstoffproduksjon, særleg i industrijordbruket. Avisa The Guardian skriv 6.4.: "Global rismangel har gitt 50 % prisstigning dei siste to vekene. Dette utløyser ei internasjonal krise, med eksportforbud og streng straff for hamstring i mange land". Dette vil kome til å  medføre matmangel, vassmangel og svoltkatastrofer, utan at det blir mindre CO₂ til atmosfæren av det heller.

"Naturkraft" har bygt eit gasskraftverk på Kårstø. Det har vore lite brukt sidan opninga sist på 2007, fordi gassen har blitt for dyr. Eigarane vil likevel  tene 500 000 kroner pr. dag det ikkje er i drift - ved salg av den frie CO₂-kvoten dei har fått gratis. Kan det gjerast meir genialt?

Eg trur vi må innstille oss på eit lågare forbruk av olje og gass på grunn av geologisk ressursbegrensning. Det er denne krisa som er akutt. Å bruke klimakrisa som trusselbilde  kan vere behageleg, men avsporande.

Det er den globale oljekrisa som vil kome til å styre både økonomien og energipolitikken dei komande åra. Mange initiativ og investeringar er både energimessig og klimamessig "på jordet". Honnør til NRK2 som viste dokumentaren Crude sist helg!